شبكات الدش الهوائي
عمرك سمعت عن (
الدش الهوائي ) ؟ يعني ايه الكلام المفركش ده ؟
الدش أصلاً كائن هوائي ويوضع فوق السطح ، ولايوجد دش مائي أو برمائي .. كلام زين
وعال العال . تعالى نخش في الموضوع
فاكرين وصلة الدش اللى كانت بعشرة جنيه في الأحياء الشعبية ثم انتشرت في مصر كلها
وأصبحت في كل البيوت وزادت حتى وصلت 30 جنيه في الأحياء الشعبية ووصلت 50 جنيه في
الأحياء الغنية والمتريشة شوية.
طوروها وخلوها شبكة فضائية بدل الأسلاك ، عشان ضباط مباحث المصنفات الفنية والأمن
الوطني ميخدوش بالهم .. ماهو الحرامي طماع والطمع بيلغي عقله.
الدراسة بعد
المقدمة البراجماتية دي دخلت في مواضيع تقنية مقعدة ، بس هختصر لكم الموضوع عشان
يبقى سهل شوية:-
بص ياسيدي : النظرية بتقول بدل ماكل واحد فينا يشترك في قنوات مشفرة للرياضة او
اجتماعية ويدفع مبالغ كبيرة .. نعمل محطة ارسال .. اي والله محطة إرسال تليفزيوني
تتضمن مثلا باقة من 16 قناة أو باقة من 24 قناة وصلت في بعض الأماكن الى باقة من
102 قناة بث عالي الجودة وظلت مفتوحة للناس لمدة 3 شهور وطبعا احنا محسناش بيها
عشان كانت في بث تجريبي ولكن ملوك الدش فضحوا نفسهم وبدأو يعملوا اعلانات .. بل
بدأوا يخشوا منافسه مع بعض.
محطة الارسال دي
مكونة من أجهزة رسيفر عليها اشتراكات رسمية في قنوات مشفرة وغالية منها الباقة
الرياضية بتاعة قطر وقنوات سكاي الرياضية التي اشتراكها في اوروبا بمبلغ محترم
وقنوات اخرى وشبكات عالمية ومحلية .. لو حسبت كلفة اشتراكك في هذه الباقات كلها
هحتاج حوالي 10 الاف دولار سنويا ولكن صاحب محطة الارسال المحلية هيعيد بثها ليك
مجانا ( جر رجل ) مش أكتر
محطة الارسال دي
مداها من 25 الى 40 كيلو فقط وتوضع فوق سطح بيت عالي او اعلى عمارة سكنية في الحي
ومكونة من طبق موصله به Smart LNB وهي نفس اللاقط اللي عندنا فوق
السطح ولكن بترددات متغيرة وواسعة لأنها هتعمل كوحدة بث وباقي الأجهزة في غرفة في
البيت أو محل دشات تحت العمارة
فيه الرسيفرات
واستقبال القنوات المشفرة وفيه جهاز اعادة تشفير القنوات دي وفيه لابتوب عليه
المشتركين وبيانتهم عشان يوصل لك الخدمة أو يقفلها عليك عن طريق شفرة مكونة من 16
رقم ورمز خاصين بكل مشترك .. يعني مفيش مشترك معاه نفس الشفرة بتاعتك .
وبعض الأجهزة
المكملة الأخرى كموزع او سويتشر وجهاز تجميع الباقات واعادة تحزيمها وهكذا
وأصبح لكل حي او
منطقة محطة ارسال خاصة بيها ولها ترددات مختلفة عن الحي التاني يعني مثلا برج
ارسال مدينة نصر يبث على تردد 12555 افقي ومعدل ترميز 45000 ولكن في العياط
والحواميدية تردد اخر لأن لديهم برج ارسال لشخص اخر .. وهكذا في بلبيس او الفيوم
.. وفي خلال 6 أشهر تم تغطية معظم الجمهورية والأمن الوطني قبض على شبكتين فقط في
المنصورة وفي الشرقية ولكن بقية المحطات تعلن كل يوم عن اشتراكات بـ 80 جنيه شهري
وغلاء الاشتراك
راجع لغلاء أجهزة البث وسرية الموضوع .. والسؤال افرض أنا عاوز اشترك اتصل على مين
وازاي ؟
طبعا أنا عملت بحث
في كل المواقع وشاهدت 120 فيديو للناس دي وتقريبا خلال أسبوع اصبحت خبير وعارف
أسماءهم ومحافظاتهم وتخصصاتهم . الاشتراك سهل أوي .. تتصل باي فني بتاع دشات يجي
يظبط لك الدش اللى هو سليم اصلا وشغال بس دي حجة .. ولما يجي تقوله عاوز اشغل الدش
الهوائي وهو هيقوم بالواجب ويقبض ويولف القنوات ويتصل بصاحب محطة الارسال ويعمل
اشتراك وكل مايلزم.
أصحاب محطات
الارسال عشان الرعب وظفوا فنين التركيبات وخاصة بتوع الشبكات عشان يشتغلوا ماركتنج
ليهم واكيد ليهم نسبة عمولة
بيعمل ايه بقى الفني
فوق السطح ؟ عشان يخليك تشوف الدش الهوائي ؟
شوف يامولانا ..
هيجيب قطعة LNB أي لاقط الاشارة الفضائية ويعمل عليها تعديل
ويغير حاجة اسمها كرسيتال المسؤلة عن التردد وهي مكتوبة على اللاقط ومعروف تردد كل
لاقط اللى هو 27500 ويغيرها بكريستال أخر تردده 30000 ميجا هيرتز .. واسمها العدسة
المعدلة في السوق لكن طبعا الاسم الصح هو LNB معدل أو سمارت .. وبكده تقدر تستقبل ترددات
البث من محطة الارسال القريبة منك سواء كنت في المرج وعين شمس والمطرية او في بني
سويف او الدقهلية او الشرقية .. فالتقنية واحدة ولكن زي ماقلنا نظرا لأن محطة
الارسال قدرتها على البث من 25 كيلو الى 40 كيلو متر فقط فأنت تحتاج لمعرفة اقرب
محطة بث لبيتك والتي يعرفها الفني .. بعد ذلك يربط الـ LNB بعصاية أو
ماسورة ولن تحتاج الطبق نفسه .. ولاتحتاج ضبط دقيق زي الدش اللى بيستقبل من النايل
سات .. لا
مجرد توجيه الـ LNB
المعدلة الى مدينة نصر مثلا أو المرج تستقبل زي اريال التليفزيون زمان بس اشارة HD وقنوات
مشفرة
موضوع مسلي صح ؟
طب تعالى نحسبها
بالراحة شوية .. الدولة غمضت عينها عن اختراع اسمه IPTV أي استقبال
قنوات مشفرة ومهكرة عن طريق النت .. وسابتهم يسترزقوا وكلنا عندنا الرسيفر اللى
بيفك الشفرة عن طريق النت وبنتفرج على الكورة والدنيا شغالة .
سعر الرسيفر ده يبدأ من 300 جنيه وعليه اشتراك لمدة سنة يعني اليوم مش مكمل جنيه ..
يعني الشهر واقف عليك بـ 25 جنيه تقوم تروح تدفع 80 جنيه في الشهر؟
قالك الرسيفر محتاج انترنت سريع ، وأحيانا كتيرة السيرفر من كتر المستخدمين بيقع
والمباراة تقطع ومش عارف تتفرج لكن الدش الهوائي مش هيقطع لأنه استقبال فضائي عادي
كأنك مشترك بنفسك. فادفع بقى ثمن المتعة والانتخة جنب المدام وهي تزغطك كل شوية بكيكة
أو طبق رز بلبن وانت بتتفرج على المباراة .. ومش بس كده ده في قنوات افلام ومنوعات
وكل ما يشتهي قلبك ومفيش سحب من باقة النت.
زمان .. زمان اوي
كنت صديق لكل
محلات الرسيفرات في باب اللوق ، وكنا بنروح نشتري كارت زي كارت ATM كده ونحط
عليه شفرة فك القنوات .. وكنت بجيب أصحابي ينفعوا الناس دي ويشتروا اجهزة وكروت فك
شفرة وبعدين بدأت اكتشف ان المحلات دي بتنصب على صحابي .. فبدأ اللوم وتطور بعد
ذلك الى انفعلات وخصام ثم مقاطعة لأن مش معقول أجيب لك زميلي او صاحبي واكبر لك
دايرة الزبائين وانت بتخون الناس دي .. وتكون عندي رأي : بتاع الدش لازم هينصب
عليك سواء رضيت او عافرت ، هي الشغلانة كده نصب في نصب لأنه لايملك المحتوى .. هو
سارقه وبيبيع للناس ممتلكات مسروقة من شركات ومؤسسات مرخصة .وجميع محلات الدش
تخشها تلاقيه مشغل محطات القرآن وعلامات التقوى زي الزبيبة .. مش بس كده ده في وسط
البيعة ( الحرام ) يقولك معلش هستأذنك اروح اصلي العصر .. ياراجل ده انت مخالف وتبيع
محتوي مسروق!!
ولما يرجع من الصلا يغشك في ثمن الرسيفر أو نوع الرسيفر أو مدة السيرفر المهم لازم
يغش وينصب .. وغالبا النصب حاليا انهم يبيعون الرسيفر بدون اريال الواي فاي ويقولك
ثمنه لوحده 60 جنيه .
زمان برضه جه ملك
الرسيفرات في مصر المسمى عبد العال لشراء مقهى في باب اللوق وكان مقهى صاحبه توفى
وزوجته ارملة لاتعرف كيف تدير مقهى وكان المحل معروض بسعر لقطة لكن تجار باب اللوق
كلهم محدش راضي يشتري المحل وعارفين ان الست هتتزنق ومحتاجة فلوس فالسعر ينزل ..
يقع .. مكنتش اعرف عبد العال ولكن اصحابي من الصنايعية عرفوني بيه وبحكايته وقالو
لي انت متعلم ومثقف والراجل معاه قرشين حلوين بدل مايشتري قهوة ممكن نعمل بزنس
جامد اوي ونكسبه وقالو اقنعه نخش شراكة ونجيب بوردة رسيفر فك شفرة من الصين ونجمع
هنا الوش أو الفريم الخارجي .. فقلت لهم اشرحو لي بالظبط عشان افهم
قالو الرسيفر اللى
فيه أنترنت ممنوع دخوله مصر ، فاحنا حنستورد البورده فقط ، ونشوف مصنع يصنع لنا
الشكل الخارجي ، والرسيفر هيخش على انه قطع غيار وبالتالي جماركه أقل ومش هيبقى
ممنوع بس اقنع الحاج عبد العال .. وانا اتاخدت لأني معرفش الراجل عشان اقنعه بحاجة
مليش فيها .. ومهما فهمت فأنا تلميذ في المجال ده .. وأهم شئ أني رجل إعلامي ولي
سمعتي وسمعة اسرتي ومقدرش امشي في سكك زي دي .. دي كانت قناعتي أيامها .. امنع
الضحك لو سمحت.
المهم عرفتهم بشخص
الله يرحمه يقدر يخدم في مواضيع البزنس وقلبه جامد لأنه اصلا نشأ في أسرة تجار
وابن سوق وكان شخص استاذ في فن الحوار وكسب صداقة أي حد وله شعبية وعلاقات فوق
خيالك .. وشرح للراجل عبد العال وساعدهم وراحو الصين اتعاقدو على بوردة رسيفر
مقتدمة جدا في الوقت ده وصنعوه واسموه كيوماكس جولد وشاء القدر ان الرسيفر ده يحقق
مبيعات فوق خيال أي انسان لدرجة أن الولاد دول سابوا المحل القديم اللى كانوا شغالين
فيه صنايعية واشتروا محل لوحدهم .. وبقوا كمان موزع حصري لرسيفر عبد العال
الكيوماكس الجولد وبعد كده زي ماحكيت نصبوا على زملاء واصدقاء فقررت مقاطعة الناس
دي لأن الموضوع فعلاً بقى غش في غش .
القصة دي مش للتسلية وخلاص .. القصة دي فيها كشف لتفصيلة واحدة من عالم حضرتك
ماتعرفش عنه أي معلومات ويكفي انك تعرف انه كيوماكس الجولد لوحده حقق له ثورة
تتعدى 17 مليون .. ودي صفقة واحدة لدرجة انه كان مأجر شقق في باب اللوق كمخازن ..
شقق كاملة.
وبعدين دخل على الرسيفر الكيوماكس الأسود اللى مشاء الله حقق مبيعات فوق خيال اي
حد لدرجة ان مواقع السات أو الدش في الوطن العربي كله كانت بتعمل اعلانات عن
الجهاز ده وعن أمكانياته وكان فعلا بيفك الشفرة ونتفرج على كل قنوات العالم.
عالم فظيع ومخفى
نرجع بقى لموضوع
الدش الفضائي وبكده تكون أخدت فكرة عن جزء من تاريخ الدشات وفك الشفرات ومشاهدة
القنوات بمبلغ بسيط ويولع اصحاب الحقوق ولو الدولة اتحركت وقبضت عليهم يقولك
بياكلوا عيش ؟
وموضوع الدش
الهوائي منتشر زي النار في الهشيم ، وجربت بنفسي التقاط القنوات ولكن لا أملك
أكاونت عند صاحب برج الارسال كما يسميه الصنايعية وبالتالي لالزوم للتعب واستقبال
هذه القنوات التي قام بتشفيرها لكي يحصل هو على المال من الناس .. وبصرف النظر عن
شبكة قطر الرياضية فهناك حقوق فهذه الشبكة لها وكيل حصري في مصر هو شركة CNE التابعة
للنايل سات وهي شركة مصرية . ومن واجب الوكيل المصري حماية حقوق الملكية للمصدر.
ومش بس كده ده فيها بعد أمن قومي مرعب ، فطالما تملك محطة ارسال فأنت قادر على بث
محتوي مسجل أو على الهواء يعني اي حد يعمل قناة في بيته ويقول اي كلام ويمكن يعدي
الخطوط الحمراء اخلاقيا أو سياسيا أو دينيا ويصبح قناة تليفزيونية تبث محتوى ضد
ثوابت المجتمع.
فالموضوع مش مجرد
قنوات رياضية بتتفرج عليها ولكن فيه جرائم كبيرة تجاريا وامنياً واخلاقياً.
والسلام ختام ..
طارق حسن