عودة فريق ( أبا ) بعد 40 سنة للغناء بنفس التكوين ولكن بسن كبير .. أصبحوا جدود .. حفلتهم كانت أغاني من التراث .. أغاني حضرها جيل وصدقهم وارتبط بيهم عاطفيا .. الجيل ده نصه أختفى والنص تاني أصبح له أولاد وأحفاد ..
وبعدين ؟
هتسمع العيال غصب عنهم حاجة انت ليك ذكريات معاها .. هيسمعوها ويجاملوك لكن مش هتأثر فيهم نهائياً .. مش هتمس عواطفهم ولاتحرك أي شئ
عارف ليه ؟
هقولك .. بص كده على بيت جدك .. بص ع العفش وفجأة والدك قالك هو ده العفش اللى ذكرياتي معاه .. هنعيش هنا .. هنتخلي عن الميكرويف ونسخن على وابور أو كانون
هنتخلي عن السخان والدفاية ونولع خشب في الشتا
هنستغنى عن الموبايل والتكييف والدش والانترنت ونستخدم القلة والطشت و ... و
احتمال ترفض من أول طلعة ، واحتمال تجامل والدك المسن عشان ذكرياته .. لكن انت مش هتقدر تعيش للنهاية .. ممكن تقضي يوم .... أسبوع وفي لحظة هتقوله لازم اعيش عصري
أعتذر ياوالدي برغم تقديري لمشاعرك ، بس أنا لي مشاعري ولي ذوقي
نفس الشئ مع ABBA غابو 40 سنة وراجعين بسنهم الكبير وكلمات أغانيهم اللى بتعبر عن زمن .. فوق كل شئ اللحن والجملة الموسيقية اتغيرت .. الأصعب ان الايقاعات والأرتام والكوردات بقت مختلفة .. تقينات بناء اللحن شكلا ومضمونا اختلفت
اللحن اللى كان ميلودي واحد مينفعش دلوقت .. حاليا في هارموني ضخم .. مفيش له حدود
كان الأبا أو أي فريق بيشتغل على سكونسر 16 تراك ومحكوم بعدد ألات 16 ألة
وكان اللحن بيدور في 16 آله
اليوم برامج الموسيقى فتحت أمام الموزع امكانية لغاية 196 آلة أو 196 تراك ففتحت عالم التوزيع على مصراعيه زي مابيقولو
فريق الأبا تأخر كثيرا للعودة ، يمكن لو كان رجع في توقيت معين كان الناس اقبلت عليه ، هذا التوقيت لما الولية انسحبت وراحت قعدت في قرية في منفى فوق في السويد ، اجنثا اللى انفصلت عن الواد الرفيع وهدمت الفرقة بانسحابها .. وفضلت عاملة لنفسها عزلة وكل لقاء معاها تدعي انها عايشة مع الكلبين حياة سعيدة .. مع ان تعبيرات وجهها كانت كلها كأبة وبطيعة السويد الباردة في الشمال .. والعزلة .. كنت تقول لنفسك الست دي غبية .. هدمت مجد فريق الابا عشان عنيدة أو مظلومة .. محدش عرف هي ليه انسحبت وفركشت الفريق
القصة ببساطة ، ان مزاج الموسيقى وثقافة الجيل الجديد مش هتسمح للأبا مرة تانية انهم يرجعوا بنفس الابهار بتاع شبابهم ، مهما عمل الميكاج والتجميل ، فأصواتهم شاخت ، حركتهم تقلت ، كلامهم مش جديد ، لحنهم فاضي اي بدون توزيعات وهارموني معاصر
كل شئ ضد فريق ABBA
تغير الجيل ، وتغير المستمع ، وهذه هي الحياه
